നവോത്ഥാന സമിതി വൈസ് ചെയർമാൻസ്ഥാനം രാജിവെച്ച ഹുസൈൻ മടവൂരിനെ പരിഹസിച്ച് എസ്.എൻ.ഡി.പി. യോഗം ജനറൽ സെക്രട്ടറി വെളളാപ്പളളി നടേശൻ. മോങ്ങാനിരുന്ന പട്ടിയുടെ തലയിൽ തേങ്ങാ വീണത് പോലെയാണ് നവോത്ഥാനാസമിതി വൈസ് ചെയർമാന്റെ രാജി എന്ന് വെളളാപ്പളളി പറഞ്ഞു.

രാജിവെക്കാൻ കാരണം തേടിയിരിക്കുകയായിരുന്നു ഹുസൈൻ മടവൂരെന്ന് പറഞ്ഞ വെള്ളാപ്പള്ളി, തന്റെ പ്രസ്ഥാവന അവസരമാക്കി രാജിവെച്ചുവെന്നും പിണറായി പറഞ്ഞാൽ അല്ലാതെ താൻ രാജിവെക്കുന്ന പ്രശ്‌നമില്ലെന്നും കൂട്ടിച്ചേർത്തു.

തുഷാറിനെ മന്ത്രിയാക്കുമെന്ന് താൻ കേട്ടിട്ടില്ല. ബി.ഡി.ജെ.സിന് മന്ത്രിസ്ഥാനം കിട്ടണമോ എന്ന് അവർ തീരുമാനിച്ചോട്ടെ. തമ്മിലടിപ്പിക്കാൻ നോക്കേണ്ട. ഇപ്പോൾ കേന്ദ്ര മന്ത്രിയായ രണ്ടു പേരും മിടുക്കരാണ്. ആലപ്പുഴയിലെയും പത്തനംതിട്ടയിലെയും എൽ.ഡി.എഫ്. സ്ഥാനാർത്ഥി നിർണയം പാളിയെന്ന് പാർട്ടി നേതൃത്വത്തെ അറിയിച്ചതാണ്. അറിയിക്കേണ്ടവരെയാണ് അറിയിച്ചത്. ആരിഫിനോട് പറയേണ്ട കാര്യമില്ലെന്നും വെളളാപ്പളളി പറഞ്ഞു.

പാർലമെന്റ് തിരഞ്ഞെടുപ്പിലെ തോൽവിയുടെ ഉത്തരവാദിത്വം പണിറായിയുടെ തലയിൽ കൊടുക്കണ്ടാ. പാർലമെന്റ് തിരഞ്ഞെടുപ്പിൽ ന്യൂനപക്ഷ വികാരം ബി.ജെ.പിക്കെതിരായിരുന്നു. അത് കോൺഗ്രസിനാണ് ഗുണം ചെയ്തത്. കഴിഞ്ഞ പാർലമെന്റ് തിരഞ്ഞെടുപ്പിലെ ഫലം ആവർത്തിച്ചു. ഇനി നിയമസഭാ തിരഞ്ഞെടുപ്പ് വരുമ്പോൾ ഇടതിനായിരിക്കും നേട്ടമുണ്ടാവുകയെന്നും വെളളാപ്പളളി പറഞ്ഞു.