കൊച്ചി: കൊച്ചിയില്‍ എടിഎം തട്ടിപ്പുകളിലെ പ്രതിയെ തേടി പോലീസ്. റോബിന്‍ ഹുഡ് എന്ന മലയാള സിനിമയിലെ എടിഎം തട്ടിപ്പിന് സമാനമാണ് കൊച്ചിയിലെ കവര്‍ച്ചയെന്നാണ് അന്വേഷണസംഘത്തിന്റെ സംശയം.പ്രതിയെന്നു കരുതുന്നയാളുടെ ചില ദൃശ്യങ്ങളും പൊലീസിന് കിട്ടിയിട്ടുണ്ട്. എ ടി എം കാര്‍ഡുപയോഗിച്ച്‌ ഓണ്‍ ലൈന്‍ സാധനങ്ങള്‍ വാങ്ങുന്നതിന്‍റെ വിശദാംശങ്ങള്‍ ഹാക്ക് ചെയ്താണ് എ ടി എം വിവരങ്ങള്‍ ശേഖരിക്കുന്നതെന്നാണ് സംശയം.

കഴിഞ്ഞ രണ്ടു മാസത്തിനുളളില്‍ കൊച്ചിയില്‍ നടന്ന ചില എടി എം കവര്‍ച്ചകള്‍ക്ക് ഈ റോബിന്‍ ഹുഡ് ഛായയുണ്ടെന്നാണ് പൊലീസ് കരുതുന്നത്. പ്രതിയെന്ന് കരുതുന്ന യുവാവിന്‍റെ ചില ചിത്രങ്ങള്‍ കടവന്ത്രയിലെ എ ടി എമ്മില്‍ നിന്ന് പൊലീസിന് കിട്ടിയിട്ടുണ്ട്. സിനിമയിലേതുപോലെതന്നെ ഹെല്‍മറ്റ് വെച്ച്‌ ബൈക്കിലാണ് വരവ്. മുഖം പുറത്തറിയാതിരിക്കാന്‍ ഹെല്‍മറ്റ് വെച്ച്‌ എ ടി എമ്മിനുളളില്‍ കയറി പണം പിന്‍വവലിക്കും. സിനിമയിലേതിനു സമാനമായി വ്യാജ എ ടി എം കാര്‍ഡുകള്‍ ഉണ്ടാക്കിയാണ് പണം പിന്‍വലിക്കുന്നത്.അര്‍ധ രാത്രിയിലോ പുലര്‍ച്ചെയോ കവര്‍ച്ച നടത്തുന്നതിനാല്‍ മൈബൈല്‍ ഫോണില്‍ സന്ദേശം വന്നാലും പണം നഷ്ടപ്പട്ടയാള്‍ അറിയുന്നത് രാവിലെയാകും. അതിനുമുന്‍പേ തന്നെ പലപ്പോഴായി മുഴുവന്‍ പണവും പിന്‍വലിച്ചിരിക്കും.