വിശ്വാസത്തേയോ ആചാരത്തേയോ സി പി എം വിലക്കാറില്ലെന്നും താനൊരു ഉറച്ച വിശ്വാസിയാണെന്നും ശബരിമലയില്‍ പോകാറുണ്ടെന്നും മഞ്ചേശ്വരത്തെ എല്‍ ഡി എഫ് സ്ഥാനാര്‍ത്ഥി ശങ്കര്‍ റൈ. കാസര്‍കോട് പ്രസ് ക്ലബ്ബില്‍ നടന്ന സ്ഥാനാര്‍ത്ഥികളുടെ മുഖാമുഖം പരിപാടിയിലാണ് അദ്ദേഹം ഇക്കാര്യങ്ങള്‍ പറഞ്ഞത്.
ശബരിമലയില്‍ വിശ്വാസമുള്ളവര്‍ക്ക് അവിടുത്തെ ആചാരങ്ങളനുസരിച്ച്‌ പോകാമെന്ന് പറയുന്ന ആളാണ് താന്‍. ശബരിമലയിലെ ആചാരമനുസരിച്ച്‌ ചില ക്രമങ്ങളുണ്ട്, പോകുന്നവര്‍ അത് പാലിക്കണമെന്നാണ് എന്റെ നിലപാട്. അത് പാലിക്കാതെ ആരു പോയാലും അത് തെറ്റാണെന്നും അദേഹം കൂട്ടിച്ചേര്‍ത്തു. യുവതികളും ആചാരം പാലിച്ചു വേണം പോകാന്‍. നിലവിലുള്ള രീതികള്‍ തുടരണമെന്നും അദേഹം പറഞ്ഞു.കോടതി വിധി നടപ്പാക്കേണ്ടതാണ്. അതിനെ കുറിച്ച്‌ സര്‍ക്കാരാണ് പറയേണ്ടത്. നിലവിലുള്ള രീതി തുടരട്ടെയെന്നതാണ് തന്റെ നിലപാടെന്നും ശങ്കര്‍ റെ വ്യക്തമാക്കി.
ശബരിമലയില്‍ ആചാരം ലംഘിക്കുന്നതിനോട് യോജിപ്പില്ല:ശബരിമലയില്‍ പോകാറുണ്ട്; മഞ്ചേശ്വരത്തെ എല്‍ ഡി എഫ് സ്ഥാനാര്‍ത്ഥി ശങ്കര്‍ റൈ
