ഡെർബി: ഡെർബിഷെയറിലും ഈസ്റ്റ് മിഡ്‌ലാൻഡ്‌സിലുമുള്ള കത്തോലിക്കാ വിശ്വാസികളുടെ പ്രധാന വാർഷിക തിരുനാളുകളിലൊന്നായ ‘ഡെർബി തിരുനാൾ’ ജൂലൈ 7 ന് (ഞായർ) ഉച്ചകഴിഞ്ഞു രണ്ടു മുതൽ ഡെർബിയിലെ ബർട്ടൻ റോഡിലുള്ള സെന്‍റ് ജോസഫ്‌സ് കത്തോലിക്കാ ദേവാലയത്തിൽ നടക്കും.

ഭാരതത്തിന്‍റെ അപ്പസ്തോലനായ മാർ തോമാശ്ലീഹായുടെയും സീറോ മലബാർ സഭയിൽനിന്നുള്ള ആദ്യ വിശുദ്ധയായ അൽഫോൻസാമ്മയുടെയും ഡെർബി മിഷന്‍റെ സ്വർഗീയ മധ്യസ്ഥനായ വിശുദ്ധ ഗബ്രിയേൽ മാലാഖയുടെയും തിരുനാൾ ഈ വർഷം മുതൽ സംയുക്തമായാണ് ആചരിക്കുന്നത്. മുൻപ്, ഡെർബിയിലും ബർട്ടൻ ഓൺ ട്രെൻഡിലുമുണ്ടായിരുന്ന രണ്ടു വിശുദ്ധ കുർബാന കേന്ദ്രങ്ങൾ ഒരുമിപ്പിച്ചാണ് ഗ്രേറ്റ് ബ്രിട്ടൺ രൂപതാധ്യക്ഷൻ മാർ ജോസഫ് സ്രാമ്പിക്കൽ ഡെർബി മിഷൻ രൂപീകരിച്ചത്. മിഷനായതിനു ശേഷമുള്ള ആദ്യ തിരുനാളെന്ന പ്രത്യേകതയും ഈ വർഷത്തെ തിരുനാളിനുണ്ട്.

ഉച്ച കഴിഞ്ഞു 2ന് സെന്‍റ് ജോസഫ്‌സ് പള്ളി വികാരി ഫാ. ജോൺ ട്രെഞ്ചാർഡ്‌ കൊടി ഉയർത്തുന്നതോടെ തിരുക്കർമ്മങ്ങൾക്ക് തുടക്കമാവും. തുടർന്ന് പ്രസുദേന്തി വാഴ്ച, 10 നു നടക്കുന്ന ആഘോഷമായ തിരുനാൾ കുർബാനയ്ക്കു മിഷൻ ഡയറക്ടർ ഫാ. ബിജു കുന്നയ്ക്കാട്ട് മുഖ്യകാർമികനാകും. നോട്ടിംഗ്ഹാം രൂപതയിലെ ക്ലിഫ്ടൺ കോർപ്പസ് ക്രിസ്റ്റി പള്ളിവികാരി ഫാ. വിൽഫ്രഡ് പെരേപ്പാടൻ എസ് സിജെ. തിരുനാൾ സന്ദേശം നൽകും. തുടർന്നു ലദീഞ്ഞ്, തിരുനാൾ പ്രദക്ഷിണം, സമാപന ആശീർവാദം എന്നിവ ഉണ്ടായിരിക്കും. സ്നേഹവിരുന്നോടെ തിരുക്കർമങ്ങൾക്ക് സമാപനമാകും.